በሀገራችን ኢትዮጵያ የሙስሊሙን ማህበረሰብ እገዛና ድጋፍን የሚሹ በርካታ ተግባራቶች ከፊት ለፊታችን ቆመዉ እንደሚጠብቁን ግልጽ ነዉ። ለዚህም ዋነኛዉ ምክንያት ለዘመናት ሙስሊሙን ማህበረሰብ አንቀሳቅሶ በየጊዜያቱ ሰብዓዊ መብቶችንና መሰል ሂደቶችን የሚያስፈጽም ሁነኛ አካል አለመኖሩም ነበር።

    በአወልያ በ2004 የተቀጣጠለዉ ህዝባዊ አመጽ ሀገራዊ ለዉጡን አስከትሎ ለድል ሲበቃ ሌሎችንም በርካታ መሰረታዊ ለዉጦችንም አያያዞ አስመዝግቧል። የትግሉ ፈር ቀዳጅ ፤ የአሻራችን ጥንስስ የተጣለበት አወልያ አሁን ደግሞ የእኛን ድጋፍ ይፈልጋል። የዚሁ ባለዉለታ ተቋማችን ያለበትን አደረጃጀት ለማሻሻል ብሎም ዘላቂነት ባለዉ መልኩ ለማቋቋም እንዲቻል በሀገር ቤት እና ከሀገር ቤት ዉጭ ግብረ ሃይል ተዋቅሮ በቅድሚያ ለትዉልድ ታሪክና ዘመን ተሻጋሪ በሆነዉ ስራ ’’ ሆስፒታሉን እናስጨርስ’’ በሚል መርህ የገንዘብ አሰባሰብ ስራዎች በሰፊዉ ተጀምረዋል። በወቅቱ የመንግስትን ጣልቃ ገብነት ለመቃወም በተደረገዉ እንቅስቃሴ በጋራ ቆመን እንዳሳየነዉ ሁሉ አሁንም ለግንባታ ፕሮጀክቱ ተግባራዊነት ለቀረበዉ ጥያቄ የገንዘብ እርዳታም ከጎናቸዉ መቆም ይጠበቅብናል።

   ይህንኑ ሥራ ለዉጤት ለማብቃትና የኛንም አሻራ ለማሳረፍ እንድንችል በቅርቡ በበድር ኮምዩኒቲዎች አማካይነት የገንዘብ ማሰባሰብ ለማድረግ ቅድመ ሁኔታዎች በመመቻቸት ላይ ናቸዉና ስራዉን በተሻለ መልኩ ለማስቀጠል በሚቻልበት መልኩ እስኪጀመር ድረስ በቂ ግንዛቤ ኖሮን የተጣለብንን ህዝባዊ ሀላፊነት ለመወጣት በዝግጅት እንጠባበቅ እንላለን።  

አላሁ አክበር

በድር ኢትዮጵያ     ሰሜን አሜሪካ    ሜይ 24 2020                       

           በድር ኢትዮጵያ ዓለም አቀፍ የሙስሊሞች ድርጅት ላለፉት 18 ዓመታት አመታዊ ጉባኤዉን በሰሜን አሜሪካ በተለያዩ ስቴቶች ሲያካሄድ ቆይቷል። የዘንድሮዉንም 19ኛዉን ጉባኤ በኢትዮጵያ ሙስሊሞች ማህበር በሲያትል ( ኢማስ ) አዘጋጅነት በዋሽንግተን ስቴት በቤልቬዩ ሂልተን ሆቴል ክንዉኑ በደመቀ ሁኔታ ተጠናቋል። የኢማስ አባላትም ለፕሮግራሙ መሳካት ያሳዩት የተቀናጀ ሥራ ዉጤት ምስጋናችን የላቀ ሲሆን ለሌሎችም ምሳሌ ሊሆን እንደሚችል በመተማመን ነዉ፣ 

         በጉባኤዉም በዋነኛነት ትኩረት ተሰጥቶት አንድ መስማሚያ ላይ የተደረሰዉ በድር ኢትዮጵያን ወደ ተሻለ ደረጃ ለማድረስ ብሎም በሀገራችን ተጽዕኖ ፈጣሪ ድርጅት እንዲሆን ለማብቃት በጥናት ቡድኑ ተዘጋጅቶ የቀረበዉን ወደ ተግባር ለማሸጋገር እንዲቻል በቀጣይ ስድስት ወራት ዉስጥ ቅድሚያ ከሚሰጣቸዉ ዋናዎቹ ስራዎች አንዱ ሲሆን ጎን ለጎን የድርጅቱን የፋይናንስ አቅም ማጎልበትና የድርጅቱን ጽ/ቤት ኢትዮጵያንም ጨምሮ ለዉጤት እንዲበቁ ማስቻል ነዉ።    

       በቀጣይ ዓመት የሚዘጋጀዉ 20ኛዉንም ጉባኤ በድር ኢትዮጵያ በዋሽንግተን ዲሲ አካባቢ የሚያዘጋጅ ሲሆን ይህም ድርጅቱ የተቋቋመበትን 20ኛዉን ዓመት ምክንያት በማድረግ ሰፋ ያሉ ፕሮግራሞች እንደሚጠበቁ ይታመናል፣