ረ መ ዳ ን ሙ ባ ረ ክ

Posted by Badr Ethiopia on

 

   በሀገራችን ኢትዮጵያ እና በዲያስፖራ የምትገኙ ሙስሊም ወንድምና እህቶች እንዲሁም ለዓለም ሙስሊም ማህበረሰብ በሙሉ እንኳን ለ 1442 ኛዉ  ዓመተ ሂጅራ የረመዳን ወር አላህ (ሱብሁዋነሁ ወተአላ) በሰላምና በጤና አደረሳችሁ በማለት ምኞቱን ይገልጻል።

  በሀገራችን ኢትዮጵያ በአሁኑ ወቅት ከዉጭ እና ከዉስጥ ዘርፈ ብዙ ችግሮች የሀገሪቱን አንድነትና ሰላም እየተፈታተኑ መሆኑን  በድር ኢትዮጵያ ይገነዘባል ። በዚህ ፈታኝና ወሳኝ ወቅት በተደጋጋሚ የንጹሀን ዜጎች በግፍ መገደል ፤ መሰደድ ፤ መፈናቀል  ብሎም ሰላም ማጣት አሳሳቢ ጉዳይ በመሆኑ ይህንኑ የመከራ ጊዜን ለመሻገር ማህበረሰቡ የሚጠበቅበትን ሁሉ ለማድረግ ግድ የሆነበት ወቅት ላይ እንገኛለን።    

   የኢትዮጵያ እስልምና ጉዳዮች ጠቅላይ ምክር ቤት (መጅሊስ) ተቋማዊ አደረጃጀቱን አስመልክቶ በሚያዝያ 23/2011 በሸራተን አዲስ የተላለፈዉን ዉሳኔ ተግባራዊ ለማድረግ የተቋሙ ህገ ደንብ በሚፈቅደዉ መሰረት የጠቅላላ ጉባኤዉ መጠራቱ ተገቢ ነዉ። በጠቅላላ ጉባኤዉ የተላለፉትን ዉሳኔዎች ተግባራዊ እንዲሆኑ መንግስትና የሚመለከታቸዉ አካላት አስፈላጊዉን ህጋዊ ከለላና ድጋፍ እንዲያደርጉ ለማሳሰብ እንወዳለን።     

   በጉባኤዉ ሂደት በተለያዩ የዉጭ አካላት በኡለማዎቻችንና አዛዉንቶቻችን ላይ ክብር በሚነካ መልኩ የደረሰዉ እንግልትና ወከባ የህግ መሰረት የሌለዉ ግልጽ ጣልቃ ገብነት በመሆኑ አስፈላጊዉ እርምት ሊወሰድ ይገባል። ኡለማዎቻችን በመካከላችሁ ያሉትን ልዩነቶች ለመፍታት በቂ እዉቀት፤ ልምድና ቁርጠኝነት ያላችሁ በመሆኑ በሙስሊሙ መካከል ሱፊ ሰለፊ ወይም ሌላ ስያሜ እየሰጡ ለመከፋፈል የሚደረገዉን ማንኛዉንም አንቅስቃሴ ተሻግራችሁ ለሙስሊሙ የአንድነት ብስራት እንደምታሰሙት ሙሉ እምነት አለን።              

   የዘንድሮዉን ረመዳን ችግሮቻችንን ታሳቢ በማድረግና አላህ (ሱብሁዋነሁ ወተአላ) ባዘዘን መሰረት በተቀደሰዉ የረመዳን ወር መልካም ስራዎችን በማብዛት ምንዳችንን ከፍ ለማድረግ ለተፈናቀሉ ዜጎች ልዩ ትኩረት በመስጠት መርዳት ፤ የተራቡ ወገኖቻችንን በመመገብ ፤ የተጎዱትን በመርዳት፤ የታመሙትን በመጎብኘትና ጾማችንን ከሚያበላሹ ስራዎች በመቆጠብ ዉጤቱ እንዲያምር ማድረግ ይጠበቅብናል።

   በመጨራሻም ለሀገራችንና ለህዝቦቿ ሰላም እንዲመጣ አበክረን ፈጣሪያችንን በጸሎት መለመንና በየበኩላችን የሚጠበቅብንን ሁሉ በማድረግ መጪዉ ጊዜ የተሻለ እንዲሆን መልካሙን በመመኘትና በመተግበር የተሳካ የረመዳን ወር እንዲሆንልን እንመኛለን። 

በድር ኢትዮጵያ     ሰሜን አሜሪካ     አፕሪል 12, 2021                                                                


← Older Post Newer Post →