እንኳን ለኢድ አል ፊጥር በዓል እደረሰን

Posted by Badr Ethiopia on

ኢ ድ    ሙ ባ ረ ክ

በሰሜን አሜሪካ፣ በሃገራችን ኢትዮጵያና በሌሎችም የዓለማችን አህጉራት ለምትገኙ ኢትዮጵያዊያን ሙስሊሞች በሙሉ እንኳን ለ1442ኛው የኢድ አልፈጥር በአል በሰላም አደረሳችሁ፣ አደረሰን። የተከበረዉን የረመዳን ወር  በሰላም አስጀምሮ ለመጨረስ ላበቃን ፈጣሪያችን ለአላህ (ሱብሃነሁ ወተአላ) ምሥጋና ይገባዉ ፤ አሜን ።

 በሰላም መፆምና መፀለይ፣ እንዲሁም ማንኛውንም አይነት ሃይማኖታዊ ግዳጆችን ለመፈፀም የሚቻለው ከምንም ነገር በላይ የሃገር ሰላም ወሳኝ እንደመሆኑ መጠን ለሀገራችን መረጋጋት የበኩላችንን በመወጣት፤መደማመጥና መከባበር የሰፈነባት፣ዜጎች በእኩልነትና በፍትህ የሚኖሩባት ፤ ለሁሉም ዜጎች በእኩል የጋራ ሃገር ስትሆን ነውና ለሀገር ሰላምና ነጻነት ልዩ ትኩረት በመስጠት ለሃገራችን ሰላምና መረጋጋት የሁላችንም ያላሰለሰ ጥረት እንደሚያሻ አበክረን እየገለጽን ሀገራችንም ካንዣበበባት የጥላቻ፣ የመገዳደልና የማፈናቀል አዙሪት እንድትወጣና ሕዝቦቿ በአንድነትና በፍቅር የሚኖሩባት እንድትሆን ፈጣሪያችንን በመማፀን በዐሉን ማክበር ይጠበቅብናል ።

    ነቢዩ መሃመድ (ሶለላሁ አለይሂ ወሰለም) ዘረኝነት ጥንብ ናትና ራቋት ብለዋል። ስለዚህ የሃይማኖት ምሁራን፣ የሃገራችን ወጣቶች እንዲሁም የፖለቲካ ሊሂቃን ከዘር የፀዱ መሆንና፣ ሰውን በሰብአዊነቱ በማክበር የዜግነትና የሃይማኖት ግዴታቸውን እንዲወጡ በድር ኢትዮጵያ የሙስሊሞች ድርጅት ጥሪውን ያቀርባል ።

    ሀገራችን በዚህ ፈታኝ ወቅት በአንድነትና በሰላም መጪውን ወቅት ለመሻገር በጥበብና በጥንቃቄ መወጣት እንዳለብን ለሁሉም ባላድርሻ አካላት ለማሳሰብ እንወዳለን። ለሰላምና ለሉአላዊነታችን መፀለይና መታገል የዜግነት ግዴታችን በመሆኑ፣ በትዕግስት ወቅታዊ ተግዳሮቶችን በመገንዘብ የማረጋጋትና የሰላም መፍትሄዎችን በማፍለቅ አወንታዊ አስተዋፅኦ እንዲያደርጉ በድር ኢትዮጵያ አበክሮ በማሳሰብ የኢድ በዓሉን ምክንያት በማድረግ ችግረኞችን በመደገፍ የኮቪድ 19 ወረርሺኝን በመከላከል እንድናከብረው እያሳሰብን በድጋሚ እንኳን ለኢድ አልፈጥር በአል አላህ በሰላም አደረሳችሁ እንላለን።

     በትላንትናዉ እለት በርዕሰ ከተማችን አዲስ አበባ ላይ የተካሄደዉ የጎዳና ላይ ኢፍጣር በደመቀ ሁናቴ በሚፈለገዉ መልኩ የተፈጸመ ሲሆን ፕሮግራሙም ትልቅ ሀገራዊ የለዉጥ ትሩፋት ዳግም የተመሰረተበት ሆኖዋል ። ለፕሮግራሙ መቃናት ከጠቅላይ ሚኒስትር ጽ/ቤት ጀምሮ እስከ አዘጋጆች እንዲሁም በተሳታፊነት ለታደማችሁ ሁሉ ደማቅ ምስጋና እያቀረብንላችሁ የክርስትና እምነት ተከታይ ሆናችሁ ከጅምሩ ለሂደቱ መቃናት ደፋ ቀና ያላችሁ እና በመጨረሻም አደባባዩን ከማጽዳት ጀምሮ ላሳያቻሁት ሀገራዊ አንድነት እና መከባባር ተምሳሌት ናችሁና ዳግም ምስጋናችን የላቀ ነዉ።                    

በድር ኢትዮጵያ   ሰሜን አሜሪካ   ሜይ 11 2021  


← Older Post