‘’አል-ነጃሺ መስጂድ’’ ታሪካዊ የሀገር ቅርስ ነዉ

Posted by Badr Ethiopia on

‘’አል-ነጃሺ መስጂድ’’ ታሪካዊ የሀገር ቅርስ ነዉ

    በዓለም ደረጃ በዩኒስኮ በቅርስነት በሀገራችን ከተመዘገቡት ውስጥ አንዱ የሆነዉ በትግራይ ክልል የሚገኘዉ የአል ነጃሺ መስጂድ ሲሆን መስጂዱም በደረሰበት ጥቃት ከፍተኛ ጉዳት እንደደረሰበት ከስፍራዉ ከሚወጡ መረጃዎች ለማወቅ ተችሏል።  

    በትግራይ ክልል በተካሄደዉ ጦርነትም ካሰክተላቸዉ የተቋማት ዉድመት አንዱ የሆነዉና ዘግይቶ የተሰማዉ የሙስሊም ማህበረሰብ የእምነት ተቋም በሆነዉ በነጃሺ መስጂድ ላይ ከፍተኛ ጥቃት መፈጸሙ እና መስጂዱም ላይ ከባድ ጉዳት እንደደረሰበት ዘገባዎች ያስረዳሉ። የእምነት (የመንፈሳዊ) ተቋማት ከማንኛዉም የጦርነት ጥቃት ኢላማ ዉጭ እንደሆኑና ሁሉም በእኩል ሊያከብራቸዉ እንደሚገባ ብሎም ከተባበሩት መንግስታት ድርጅት መርሆች አንዱ እንደሆነ ቢታወቅም በነጃሺ መስጂድ ላይ የተፈጸመዉ ህገ ወጥ ድርጊት በማንአለብኝነት የተፈጸመ ብቻ ሳይሆን ሙስሊሙን ማህበረሰብ ለመፈታተን ሆን ተብሎ የተሰራ ጥቃት ሲሆን በሌላ መልኩ በትግራይ ክልል በቅርስነት የሚታወቀዉን የነጃሺ መስጂድን ህልዉና ለማጥፋት የተደረገ ድብቅ አጀንዳም ነዉ።

   ጥቃቱ በማን እንደተፈጸመ በዉል የሚታወቅ ነገር ባይኖርም በትግራይ ክልል በተለይ በአክሱም ሙስሊሙ ማህበረሰብ እምነቱን በነጻነት በአግባቡ እንዳይተገብር የመስጂድ ግምባታ ቦታ ካለመፈቀዱ አልፎ የተከበረዉ አስክሬኑን አንኳ እንዳያሳርፍ የመቃብር ቦታ ማዕቀብ የተጣለበት አካባቢ ከመሆኑ አንጻር ሀዘኔታዉ እጅግ የከፋ ነዉ። 

    በሀገራችን በሙስሊሙ ማህበረሰብ ላይ አይነቱን እየቀያየሩ የሚፈጸሙበት በደሎች ቀላል አይደሉም ። ሆኖም ችግሮቹን አቅም በፈቀደ መጠን ለመቅረፍ የሚያስችል የተቋማዊ አቅም ግንባታ በመመስረት በፌድራል መጅሊስ በኩል ከፍተኛ ክትትል ሊደረግ እንደሚገባ ለመጠቆም እንወዳለን።   

    የነጃሺ መስጂድ ታሪካዊና ሀገራዊ ቅርስ ከመሆኑ አንጻር መንግስት ትልቅ ትኩረት በመስጠት አስፈላጊዉን ግንባታ በማከናወን በነበረበት መልኩ ማስቆም እንደሚገባዉ እየገለጽን ጥፋቱን የፈጸሙ አካላት ማንነትም በዉል ተጣርቶ ለህዝብ ይፋ እንዲደረግ አበክረን እየጠየቅን በበድር ኢትዮጵያ በኩል የሚደረገዉን የማጣራት ሂደትም እንደተጠናቀቀ ውጤቱን በቀጣይ የምናሳዉቅ ይሆናል።

አላህ (ሱብሁዋነዉ ወተአላ) ሀገራችንን ይጠብቅልን

በድር ኢትዮጵያ    ሰሜን አሜሪካ     ጃንዋሪ 2 2021                       


← Older Post Newer Post →