በአላህ ስም እጅግ በጣም ርህሩህ በጣም አዛኝ በሆነዉ

በበድር አካዉንት ተሰብስቦ ስለነበረዉ ገንዘብ ማብራሪያ ስለመስጠት

     የኢትዮጵያ ሙስሊሞች ላለፉት አምስት ተከታታይ ዓመታት የመብት ፤ የእምነት ነጻነት እና የህገ መንግስት መከበር ጥያቄን አስመልክቶ ሰላማዊ እንቅስቃሴ ሲያከናዉኑ መቆየቱ ግልጽ ነዉ።  ከሙስሊሙ ማህበረሰብ የቀረቡ ሶስት መሰረታዊ የእምነት ነጻነት ጥያቄዎች ምላሽ እንዲያገኙ ብሎም በተቻለ መጠን ሰላማዊነቱን ጠብቆ እንዲጓዝ በብቃት ማስፈጸም የሚችሉ የመፍትሄ አፈላላጊ ኮሚቴ በማዋቀር እንቅስቃሴዉን በይፋ ጀምረዋል።

    በዲያስፖራ የምንገኝ ሙስሊም ማህበረሰብም ለመፍትሄ አፈላላጊ ኮሚቴዎች የዉክልና ፊርማ ከማሳረፍ ጀምሮ ሁሉም አቅም በፈቀደ መጠን ጠንካራ እንቅስቃሴ ያደረጉና በማድረግ ላይ ያሉ ሲሆኑ በተለይ በየኮምዩኒቲዎች ደረጃ የታየዉ እንቅስቃሴ እጅግ በጣም አኩሪ ነበር።

      ከህዝበ ሙስሊሙ ሙሉ ዉክልና የተሰጣቸዉ የመፍትሄ አፈላላጊ የኮሚቴ አባላትም ሆነ ሌሎች ከኮሚቴዉ ጋር ግንኙነት አላቸዉ ተብለዉ የሚገመቱ ወንድሞችና እህቶች በመንግስት በግፍ ለእስር እና መሰል ስቃዮች በመዳረጋቸዉ ሳቢያ እንዲሁም የታሳሪ እና ከሀገር የተሰደዱ ቤተሰቦችን ጨምሮ ለመደገፍ እንዲቻል ከየኮምዩኒቲዎች የገንዘብ ማሰባሰብ መካሄዱና ይህም ገንዘብ በበድር አካዉንት ገቢ ሆኖ ለሚፈለገዉ አገልግሎት እንዲዉል በማሰብ መከናወኑ ይታወቃል።

   የዚህ ገንዘብ አፈጻጸም በወቅቱ በነበረዉ የሀገራችን የፖለቲካ ሁኔታ ፤ የመፍትሄ አፈላላጊ ኮሚቴዎቻችን እና ከነሱ ጋር ተያያዥነት ባላቸዉ ጉዳዮች በርካታ የሙስሊሙ ማህበረሰብ በግፍ ለእስር የተዳረገበትና የተለያዩ አይነት ሰቆቃዎች ይፈጸምባቸዉ በነበረበት ወቅት ስለነበር ይህን መሰል መረጃዎች ለህዝብ መልቀቁ በህዝባችን ላይ ሊደርስ የሚችለዉን የከፋ በደልና ችግር እንዲሁም መንግስት ለፖለቲካ ፍጆታ ሊጠቀምበት እንደሚችል በመገመት መረጃዉን ማቆየቱ ይታወቃል። ሆኖም ይህ ሂደት በዲያስፖራ በምንገኝ ሙስሊም ማህበረሰብ መካከል በተፈጠሩ የአካሄድ ልዩነቶች ሳቢያ ሂደቱ አቅጣጫዉን ቀይሮ በአሁኑ ወቅት የችግሮቻችን መሰረት ሆኖ እየቀረበ እንደሆነ ይታወቃል።

      በፋሚሊ ሰፖርት እና ኢመርጀንሲ ፈንድ በሚል የተሰበሰበዉ ገንዘብ በአግባቡ በወቅቱ ለነበሩ የኮሚቴዉ አባላት በማድረስ ስለመረከባቸዉም በፊርማቸዉ ያረጋገጡበትን መረጃ መኖሩ እና ከዚህ ቀደም በሲያትል ኮምዩኒቲ ለአባላት እና በናሽፊል እና ሳንዲያጎ ደግሞ በየዓመቱ በተደረገዉ የበድር ዓመታዊ ኮንቬንሽን ለተሳታፊ አባላት እንዲሁም በቅርቡ ሰላም ፋዉንዴሽን ባዘጋጀዉ የህዝብ ስብሰባ በግልጽ ያስረዳንና መረጃዉንም ለማሳየት ተችሏል። ይህንኑ የበድር አባል ላልሆኑ አካላትም በግልጽ ለማሳወቅ እየወደድን በአሁኑ ወቅት ለመግለጽ የተገደድንበት ሁናቴም በተፈጠሩ አለመግባባቶች ሳቢያ ላሉት ልዩነቶች የችግሩ ምክንያት ገንዘቡን አድርገዉ ያለአግባብ እየተጠቀሙበት ስለሆነና በሌላ መልኩ በአሁን ወቅት በሀገራችን ያለዉን የፖለቲካ ሂደት እንዲሁም የመፍትሄ አፈላላጊ ኮሚቴዎቻችን ያሉበትን ሁናቴ ግምት ዉስጥ በማስገባት በወቅቱ የተሰበሰበዉ ገንዘብ የደረሰበትን ደረጃ ለህዝብ ይፋ በማድረግ ማሳወቁ አስፈላጊ ሆኖ በመገኘቱ ሲሆን ለወደፊትም ቢሆን ይህን መሰል ጥንቃቄ የሚሹ እንቅስቃሴዎች በማንኛዉም ወገን በሚከናወኑበት ጊዜ አንገብጋቢነታቸዉን ግምት ዉስጥ በማስገባት መወሰድ የሚገባቸዉን ጥንቃቄዎች ትኩረት ሰጥተን መንቀሳቀስ እንደሚገባን ለማስገንዘብ እንወዳለን።

 አላህ (ሱወ) ቀጥተኛዉን መንገድ ይምራን

     በድር ኢትዮጵያ   

   ሰሜን አሜሪካ                                                                                                                       

  ጁን 27, 2018

 

 

 

 

 

 

                               

                                   በአላህ ስም እጅግ በጣም ርህሩህ በጣም አዛኝ በሆነዉ

     ሙ ባ ረ ክ

     በሰሜን አሜሪካ እና  በመላዉ ዓለም ለምትገኙ ሙስሊሞች እንኳን ለ 1439 ኛዉ ለተከበረዉ የኢድ አልፊጥር በዓል በሰላም አደረሳችሁ እያልን የዘንድሮዉ ኢድ ለየት የሚያደርገዉ ያለ በቂ ምክንያት በፖለቲካ ሽፋን ለእስር ተዳርገዉ የነበሩ ብርቅዬ ዉድ ኮሚቴዎቻችን እና ከሰላማዊ እንቅስቃሴዉ ጋር በተያያዥነት ታስረዉ የነበሩ ከእስር ተፈተዉ ከሚወዳቸዉ ማህበረሰብ እና ከናፈቋቸዉ ቤተሰቦቻቸዉ ጋር መቀላቀላቸዉ ነዉ። በድጋሚ አልኸምዱሊላሂ እንላለን ።

      ከሰላማዊ የእምነት ነጻነት እና የመብት ጥያቄዉ ጋር በተያያዘ አሁንም በየ እስር ቤቱ እየማቀቁ ያሉ ወገኖቻችን ሁሉ እንዲፈቱ በዱዐ እንድናስታዉሳቸዉ ሆኖ በዓሉ የሰላምና የፍቅር እንዲሆንልን በመመኘት የተራበና የታረዘን እያስታወስን በሀገራችንም ዘላቂነት ባለዉ መልኩ የተረጋጋ ሰላም እንዲመጣ በመመኘት እንዲሁም በሮመዳን ስንተገብራቸዉ የነበሩ መልካም ኢባዳዎች እና የይቅርታና የወንድማማችነት ጅማሮዎች ሂደታቸዉ ቀጣይነት እንዲኖራቸዉ በጽኑ እንሻለን።

   የአክሱም ሙስሊም ህብረተሰብ ለረጅም ዓመታት የመብት ጥያቄ ቢያቀርቡም ምንም ምላሽ ሳያገኙ በመመላለስ ብቻ እስከ ዛሬ የመስጂድም ሆነ የቀብር ቦታ አለመፈቀዱ በሀገሪቱ ታሪክ በጣም አሳዛኝ የሆነ ተጽእኖ ተፈጽሞባቸዋል። ይህንን ጉዳይ የፌዴራል መንግስትም ሆነ የክልል አስፈጻሚ አካላት በተቀናጀ መልኩ አስቸኳይ መፍትሄ እንዲሰጣቸዉ እያሳሰብን በዉጭ የምንገኝ ሙስሊም ማህበረሰብም የማስፈጸም ግዴታ እንዳለብን አዉቀን የሚፈለግብን ሁሉ ለማድረግ ብሎም የድርሻችንን ለመወጣት መዘጋጀት እንዳለብን ለማሳሰብ እንወዳለን። 

    በኢትዮጵያ ብሎም በመላዉ ዓለም ለሚገኙና ሰላም ፤ ፍትህ ፤ ደህንነት እና ነጻነትን ለተነፈጉ ሙስሊሞችና ሙስሊም ላልሆኑ ወገኖቻችን በሚያደርጉት የሰላማዊ ትግል ጉዞ ላይ እንደ ሁልጊዜዉም ከጎናቸዉ የምንቆም መሆናችንን እያበሰርን የዘንድሮ  ‘’ ኑ በአላህ መንገድ ላይ እንተጋገዝ ‘’  በሚለዉ መርህ በሰላም ፋዉንዴሽን አዘጋጅነት ከጁላይ 26 እስከ 29 በሚካሄደዉ በአይነቱ እጅግ ልዩና ታሪካዊ በሆነዉ 18 ኛዉ ዓመታዊ የበድር ኮንቬንሽን ከተጋባዥ እንግዶቻችን ዉድ የኮሚቴዉ ሰብሳቢ ኡስታዝ አቡበከር አህመድ ፤ ታላቁ አሊማችን ሼህ ሙሀመድ ሀሚድን እና  ሌሎች ስመጥርና በዳዕዋቸዉ የብዙሀኑን ቀልብ የሳቡ ዳኢዎቻችን ጋር ለመታደም እንደምትገኙ ተስፋ በማድረግ በዓሉን በደስታ የምናሳልፈዉ እንዲሆንልን መልካም ምኞታችንን እንገልጻለን።

    ተቀበለሏሁ ሚና ወሚንኩም ሷሊኸል አዕማል 

በድር ኢትዮጵያ                                                                                                                                        

ሰሜን አሜሪካ                                                                                                                                         

ጁን 14 2018