logo

 

Image result for in the name of allah in arabic

    (በአላህ ስም እጅግ በጣም ርህሩህ በጣም አዛኝ በሆነዉ)

በኢትዮጵያ  ሙስሊሞች የመፍትሄ አፈላላጊ ኮሚቴዎች

ላይ የተላለፈዉን ዉሳኔ በተመለከተ በድር ኢትዮጵያ የተሰጠ መግለጫ

የኢትዮጵያ ሙስሊሞች ፍጹም ሰላማዊና ህገ-መንግስትን መሰረት ያደረገ የመብት ጥያቄን ለመንግስት እንዲያደርሱለት ህዝቡ በራሱ ፍላጎት በፊርማዉ ባደባባይ መርጦ የላካቸዉ ተወካዮቹ ( ኮሚቴዎቹ ) በተራዘመ ፍትህ ከሶስት አመት በላይ በእስር ላይ መቆየታቸዉ የሚታወቅ ነዉ። እነዚህ ብርቅዬ የሙስሊሙ ተወካዮች ለመንግስት እንዲያደርሱ የተሰጣቸዉን ሶስት መሰረታዊ የሙስሊሙን ማህበረሰብ ጥያቄዎች በጽሁፍም በአካልም በመገናኘት ከተለያዩ የመንግስት አካላት ጋር ሲያስረዱና ሲደራደሩ ቆይተዋል።

መንግስትም በወቅቱ የቀረቡለትን የመብት ጥያቄዎች አግባብ መሆናቸዉን እና የሙስሊሙን ማህበረሰብ ጨዋነት በተደጋጋሚ መመስከሩ ይታወቃል። ህዝበ ሙስሊሙም ላቀረበዉ ህጋዊ፣ ሰላማዊ እና ህገመንግስታዊ የመብት ጥያቄ ከመንግስት በጎ ምላሽ በትእግስት በመጠባበቅ ላይ ሳለ ነበር ጭራሽ የህዝቡን አደራ ለማድረስ በክብር የተላኩትን ተወካዮች ያለ አግባብ ለእስር የተዳረጉት።

እነዚህ ዉድ የሀይማኖት መሪዎች ከሶስት አመት በላይ በፍትህ እጦት ምክንያት ከቤተሰቦቻቸዉና ከሚወዷቸዉ ህዝብ ተነጥለዉ በእስር እየተንገላቱ ም ሳለ ነበር ሙስሊሙ ማህበረሰብ ግን መንግስት ድምጹን ይሰማዉ ዘንድ በተለያዩ መንገዶች ቀድሞ በጀመረዉ ሰላማዊ መንገድ ብቻ ትግሉን በጽናት ያቀጣጠለዉ።

በድር ኢትዮጵያም ይህንን ሰላማዊ የመብት ጥያቄና ንቅናቄ ከጅምሩ በቅርበት ሲከታተለዉ እንደነበር እና ዉድ የህዝበ ሙስሊሙ ኮሚቴዎችም የተከሰሱበት የሽብርተኝነት ክስ ከነሱ ባህሪና ስነምግባር ጋር በማንኛዉም መልኩ እንደማይገናኙና ህገ መንግስቱ ያጎናጸፋቸዉን መብት ተጠቅመዉ የሀይማኖት ነጻነታቸዉን እንዲከበር በሰላማዊ መንገድ ሲያግባቡ (ሲጠይቁ ) የነበሩ ስለመሆናቸዉ በተለያየ ጊዜያት ሲገልጽ ቆይቷል።

ፍርድ ቤቱ ጉዳዩን በአግባቡ በማጤን ማህበረሰቡን የሚያስማማ ዘላቂ የሆነ መፍትሄ ይሰጣል ብለን ብንገምትም በሰኔ 29 2007 መላዉን ሙስሊም ማህበረሰብ ከመንግስት ጋር ሆድና ጀርባ የሚያደርገዉን የፍርድ ዉሳኔ አስተላልፏል። የተሰጠዉ ዉሳኔም መርጦ በላካቸዉ ኮሚቴዉ ብሎም በመላዉ ሙስሊሙ ማህበረሰብ ላይ የተላለፈ እንደሆነና አላማዉም ሙስሊሙ ተሸማቆ ባገሩ ባይተዋር ሆኖ እንዲኖር ብሎም ዳግም የመብት ጥያቄ እንዳያነሳ ለማድረግ እንደሆነ ግልጽና አመላካች ነዉ።

መንግስትም ዳግም ጉዳዩን በመመርመር ይህንን የተዛባ የፍርድ ቤት ዉሳኔ እንዲመለከተዉ እና የተዘነበለዉን ፍትህ እንዲያቃና በአንክሮ እየጠየቅን በድር ኢትዮጵያም የተሰጠዉን የጥፋተኝነት ውሳኔ የማይቀበለዉ እና በጽኑ የሚያወግዘዉ መሆኑን እያሳወቅን ሙስሊሙ ማህበረሰብም ሰላማዊ የመብት ጥያቄዉን በአላህ ፈቃድ ከዳር ለማድረ በጽናት ይቆም ዘንድ ጥሪያችንን እናቀርባለን።

ከመቼዉም ጊዜ የተሻለ ጠንካራ አንድነታችንን እንገንባ

አላሁ አክበር!

በድር ኢትዮጵያ አለም-አቀፍ የሙስሊሞች ድርጅት የዳይሬክተሮች ቦርድ

ሰሜን አሜሪካ

July 7, 2015

 

Badr 2014 Covention Completed Successfully

For more pictures and info: www.badrethiopia.org/convention | Click here for even more pictures