በአላህ ስም እጅግ በጣም ርህሩህ በጣም አዛኝ በሆነዉ

በቂሊንጦ ማረሚያ ቤት የተከሰተዉን የእሳት ቃጠሎ በተመለከተ የተሰጠ መግለጫ

     ለእምነት ነጻነት ሲታገሉ የታሰሩ አያሌ ሙስሊም ወንድሞችና እህቶች፤ በርካታ የፖለቲካ መሪዎች፤ ጋዜጠኞች እንዲሁም ሌሎች ታስረዉ በሚገኙበት የቂሊንጦ እስር ቤት ተከሰተ በተባለዉ የእሳት ቃጠሎ ሳቢያ የሞቱና የተጎዱ ወገኖች መጠን ሲነገር መስማታችን በጣም አሳዝኖናል። በእስር ቤት የሚገኙ አካላት በመንግስት ጥላ ስር ያሉ እንደመሆናቸዉ መጠን ልዩ  እንክብካቤና ጥበቃ ሊደረግላቸዉ ሲገባ በዚህ መልኩ ህይወታቸዉ ማለፉ አጠያያቂ ጉዳይ ነዉ። በመንግስት በኩልም የተስተካከለና ግልጽነት ያለዉ ወቅታዊ የሆነ መግለጫ አለመሰጠቱም ቃጠሎዉ በአደጋ ተፈጸመ ለማለት አጠራጣሪ እንደሆነ ዜጎችና የዉጭ ታዛቢዎች አስተያየት እየሰጡበት ይገኛሉ።  

     መንግስት በማረሚያ ቤቶች ላሉ ዜጎችም ሆነ ለመላዉ ማህበረሰብ ሰላምና ጸጥታ ሀላፊነት ያለበት ሲሆን በሰዉ ሰራሽም ሆነ በተፈጥሮ አደጋ ህይወታቸዉ ሲጠፋ ግልጽነትና ፍጥነት ባለዉ መልኩ ለዜጎች ማሳወቅ ግዴታዉ ነዉ። ከዚህም አኳያ መንግስት የጉዳዩን አሳሳቢነት ተገንዝቦ ምክንያቱን በአፋጣኝ አጣርቶ  ለህዝብ ይፋ እንዲያደርግ ለመጠቆም እንወዳለን።  

    በድር ኢትዮጵያ ለተጎዱ ታሳሪዎችና ለሟች ቤተሰቦች መጽናናርን እየተመኘ ፤ ይህንን ጉዳይ በአንክሮ እየተከታተልን መሆኑን ለማሳወቅ እንፈልጋለን። የኢትዮጵያ ሙስሊሞች የመብት ነጻነት ማስከበር ሰላማዊ እንቅስቃሴ ዛሬም እንደ  ቀድሞዉ  አጋርነቱን በጽናት ሲገልጽ ለሚደረጉ የሰላማዊ ትግሉ ተኮር እንቅስቃሴዎች በማንኛዉም መልኩ ለመደገፍና የበኩሉን ድርሻ  ለመወጣት ዛሬም በዚህ ፈታኝ ወቅትም ሆነ እስከመጨረሻዉ ዝግጁ መሆኑን እንገልጻለን።

  ህዝበ ሙስሊሙም  ለታሳሪዎች እና ለቤተሰቦቻቸዉ የተለመደዉን እስላማዊ ትብብር እና እገዛዉን በማጠናከር ድጋፍ እንዲያደርግ በዚህ አጋጣሚ ለማስታወስ እንወዳለን።

           ለእምነት ነጻነት መታገል የአላማ ጽናት ወሳኝ ነዉና በአላማችን የምንጸና አላህ ያድርገን !!!                                        

                                                                                                                                          

            በድር ኢትዮጵያ የዳይሬክተሮች ቦርድ   

        ሰሜን አሜሪካ

                                                      september 7 2016                                           

 

 

 

 

 

                                                                                                                                     

 

 

 

 

 

 

 

 

                                           

                                                                                                                                በአላህ ስም እጅግ በጣም ርህሩህ በጣም አዛኝ በሆነዉ 

 በሀገራችን  ወቅታዊ ሁኔታ የተሰጠ መግለጫ

     ህዝቦች የመልካም አስተዳደር ጥያቄ ይዘዉ በሰላማዊ መንገድ መንግስትን ሲጠይቁ በዉጭ ሀይል ተገፍተዉ ነዉ፤  ሰላምን ለማደፍረስ ፤ እድገትን ለማጓተት በሚልና የተለያዩ  ግንዛቤዎችን በመፍጠር የህዝብን ድምጽ በሀይል  ለማፈን መሞከር እየዋለ እያደር የበለጠ አመጽና ሁከት ይፈጥራል እንጂ መፍትሄ አያመጣም።

     የኢትዮጵያ ሙስሊሞች ህገ መንግስታዊ ፤ ሰላማዊ ፤ የመብትና የእምነት ነጻነት ጥያቄ በአግባቡ አለመፈታት እንዲሁም  የመፍትሄ አፈላላጊ ኮሚቴዎቹ በሀይልና በግፍ አለአግባብ ለረጅም ጊዜ ለእስር መዳረግ በሙስሊሙ ማህበረሰብ ቁጣንና ብሶትን እንዳላበሰ ይገኛል። ዛሬ በየ አካባቢዉ ህዝቡ በመልካም አስተዳደር እጦትና ብሶት ደፍሮ  በመነሳት ለመብቱ እንደ ሙስሊሞች እጁን ከፍ አድርጎ በማጣመር ሰላማዊነቱን እያሳየ ብሶቱንና ተቃዉሞዉን እያሰማ ይገኛል።

    የህዝብ ብሶት የሆነዉ የኦሮሞ ፤ የአማራና የሌሎችም አካላት ጥያቄ በሰላማዊና በዲሞክራሲያዊ መንገድ ካልተፈታ በስተቀር በሚወሰዱ እርምጃዎችም ሆነ ህዝብን በማሸማቀቅ ብሎም በማስፈራራት ለማብረድ እየተደረገ ያለዉ ጥረት  ዘላቂ መፍትሄን ሊያመጣ አይችልም።

     በድር ኢትዮጵያ ዓለም አቀፍ የሙስሊሞች ድርጅትም ህዝቦች በሰላማዊ መንገድ ለሚያቀርቡዋቸዉ ጥያቄዎች ሁሉ ምላሻቸዉም በሰላማዊ መንገድና ዘለቄታዊነት ባለዉ ይዘት  መፍትሄ መስጠት እንጅ ግድያ ፤ ድብደባ ፤እስራትና እንግልት መፍትሄ  አለመሆኑን ያምናል።  በንጹሀን ዜጎች ላይ እየተወሰደ ያለዉንም እርምጃ በጽኑ ያወግዛል።

     መንግስትም የጉዳዩን አሳሳቢነት ትኩረት ሰጥቶት የህዝቦችን ሰላማዊና ህገ መንግስታዊ የመብት ጥያቄዎች ብቁ ምላሽ ይሰጥ ዘንድ አበክረን እየጠቆምን የመፍትሄ አፈላላጊ ኮሚቴዎቻችን እስኪፈቱ እና የተጠየቁ መሰረታዊ የእምነት ጥያቄዎችችን  ሳይሸራረፉ እስኪመለሱ ድረስ ሰላማዊ እንቅስቃሴያችንን በተሻለና በተጠናከረ መልኩ በጽናት እንቀጥላለን።

   ህዝቦቿ በሰላምና በመከባበር የሚኖሩባትና በህግ የበላይነት የምትመራ ኢትዮጵያ እንድትኖረን ጸሎታችንና ምኞታችን ነዉ። አላህ (ሱወ) ይርዳን                                   

                                                                                             በድር ኢትዮጵያ የዳይሬክተሮች ቦርድ                                                                                                                                                                                ሰሜን አሜሪካ                                                                                                                                                                                            ኦገስት 13 2016