በአላህ ስም እጅግ በጣም ርህሩህ በጣም አዛኝ በሆነዉ

የሰላም ጥሪ

   ባለፉት ጥቂት ዓመታት ዲያስፖራ በምንገኝ ሙስሊም ማህበረሰብ መካከል ተከስተዉ የነበሩ ዉዥንብሮች የመጥራት ባህሪ ማሳየታቸዉና ይሰነዘሩ በነበሩ አሉባልታዎችና የስም ማጥፋት ዘመቻዎች ምትክም እርቅና አብሮ መስራት በሚሉ መልካም ቃላቶች ተቀይረዉ መገኘታቸዉና በሶሻል ሚዲያ ሲነገሩ መስማታችን ጅማሮዉን ከማድነቅ እና አልኸምዱሊላሂ ከማለት በስተቀር ሌላ ምላሽ ከቶ ሊኖረን አይችልም።

    በድር ኢትዮጵያ እንደ የእምነት ድርጅትነቱ ሰላምን መርህ አድርጎ ለኡማዉ ጠቀሜታ አብሮ ለመስራት የተቻለዉን ሁሉ ሲያደርግ እንደነበር እንረዳለን፤ በድርጅቶች መካከል ተፈጥረዉ የነበሩ አላስፈላጊ አካሄዶችን ግምት ዉስጥ በማስገባት እና በኡማዉ ላይ ሊደርሱ የሚችሉትን ፊትና ለማስቀረት በተለያዩ  አካላት በተዘጋጁ የተለያዩ ስብሰባዎች ላይ በድር ችግሮች እንዲፈቱ ካለዉ ጽኑ ፍላገት በመነጨ ስብሰባዎች ላይ ተገኝቷል፤ ምንም እንኳን ሌሎች አካላት ባይገኙም።

     የበድር ድርጅት እና አመራሩ ኢስላማዊ አደብ በሌለዉ መንገድ በከንቱ ሲወነጀሉ ሌሎች በተለይ ጉዳዩን በአግባቡ የሚያዉቁ አካላት ምንም አለማለታቸዉ ቢያሳዝነንም የስም ማጥፋት ዘመቻን ጊዜ ይፍታዉ ከማለት በስተቀር የግለሰብም ሆነ የድርጅት ስም አንስቶ የተቸንበት ጊዜ አለመኖሩ ወንድማማችነትን እና ኡማዉን አንድ ለማድረግ የዓላማዉ ጉልህ ማስረጃ ነዉ ብለንም እናምናለን ።

    በሀገር ቤት የሙስሊሙ ህብረተሰብ ባደረገዉ ሰላማዊ የመብትና የእምነት ነጻነት ጥያቄ ለዉጤት ለማብቃትም ድርጅቱ አቅም በፈቀደ መጠን ሁሉ በመንቀሳቀስ ጥረት አድርጓል። ከሰሞኑ ከበድር ኢትዮጵያ ጋር አብሮ ለመስራት የሰላም ጥሪ እንደቀረበ በሶሻል ሚዲያ እየተነገረ ነዉ። ሀሳቡ ምንጊዜም ስንመኘዉና ስንናፍቀዉ የነበረ ቢሆንም ከአንዳንድ ኸይር ፈላጊ ወንድሞች ይህን በተመለከተ ለማሸማገል ሀሳብ ከመኖሩ ዉጪ እንደ ድርጅት ለድርጅታችን የሰላም ጥሪን የሚመለከት በደብዳቤም ሆነ በኢሜይል የደረሰን ምንም ዓይነት ጥሪ አለመኖሩን ለአባላቶቻችንና ለሰላም ወዳድ ወገኖቻችን ግልጽ ለማድረግ እንወዳለን። ለእርቅና አብሮ ለመስራት በራችን እንደ ትናንቱ ዛሬም ክፍት መሆኑን ዳግም እየገለጽን በነበሩ ክፍተቶች ላይ ገለልተኛ በሆነ አካል አማካይነት ዉይይት ተደርጎ ለተፈጸሙ የስም ማጥፋት ዘመቻዎች የማጥራት ሂደት ተከናዉኖ ዘላቂ መፍትሄ በመሻት ሁሉም የበኩሉን ጥረት እንዲያደርግ ብሎም አብሮ ለመስራት እና ይቅር ለመባባል አላህ (.) በሚወደዉ መንገድ ተፈጻሚ እንዲሆን የበኩላችንን ለማለት እየወደድን የነበሩ ልዩነቶችን አስወግደን በጋራ ወደፊት ለሚጠበቅብን ሰፊ ተግባር እንድንዘጋጅ ጥሪያችንን እናቀርባለን። 

አላህ (.) ቀጥተኛዉን መንገድ ይምራን

                                              በድር ኢትዮጵያ                                                                                                                           ሰሜንአሜሪካ                                                                                                                                 ሰኔ 7 2018